Hilabi pa nga magalubong sa krisis kag magatulod sa pagkawasak sa industriya sang kalamay ang ginpaguwa sang Department of Agriculture (DA) kag Sugar Regulatory Administration (SRA) nga Sugar Order (SO) No. 2 sang Enero 14 sa sini nga tuig. Pagpabor ini sa mga dalagko nga mga kumprador burgesya nga mga traders nga magbakal sang tuman ka barato nga nagabaha nga lokal nga kalamay sa mga sentrales para mangin prayoridad sa kontrata sang importasyon sang gobyerno sa palaabuton.

Subongman, ang SO 2 pagpadayon sang polisiya nga wala untat nga importasyon sang reaksyonaryong estado nga amo subong ang mayor nga rason sang ginaatubang nga krisis sang kalamay sa Negros. Asod-asod nga nag-import ini sang dako nga bulto sang kalamay (220,000 metric tons (MT) sang 2024-2025 kag 424,000 MT sang 2025-2026) sa panahon nga manug-imbukada ang galing nga nagresulta sa pagpunsok sang lokal nga kalamay sa mga bodega sang sentral kag nagtulod sang tuman nga pagnubo sang presyo nga naglab-ot sa ₱2,100.

Pagsalbar man ini sa kaugalingon paagi sa pagpilit sa mga traders nga baklon ang 300,000MT nga lokal nga kalamay agud makabenepisyo sa dako nga importasyon sa palaabuton.

Nagpabor ang mga traders sa SO No. 2 tungod makahakop sila sang super ganansya sa wala kontrol nga importasyon sang barato nga kalamay halin sa iban nga mga pungsod kon ikomparar sa produkto nga lokal nga kalamay. Nagabenepisyo sila sa pagmanipular nga magpabilin nga mataas ang presyo sa merkado sang kada kilo sang kalamay bisan pa nagabaha ang produkto nga kalamay sa pungsod.

Ini man nga eskima nagatuyo nga pakalmahon ang nagabalingaso nga kaakig sang mga agrarian reform beneficiaries (ARBs) kag mga small planters batuk sa sining mga ahensya sang gobyerno nga amo ang sa likod sa pagbaha sang kalamay sa isla.

Nagpahayag na sang mabaskog nga pagpakamalaut ang mga organisasyon sang ARBs kag mga plantador sa ginpahayag sang SRA, nga tungod sang SO 2 nagsaka ang bili sang kalamay sa kutimoy nga ₱20-30. Indi na sila makabenepisyo sa ining pagsaka sang presyo tungod kadam-an sa ila sang nagligad pa nga tuig nakatapos pagaling.

Nagaantus sila subong sang tuman nga kapigaduhon tungod sa natabo nga pagsarurot sang presyo sang kalamay. Ang subong nga pagsaka sang presyo temporaryo lamang, indi signipikante kag indi pangmalawigon.

Indi katingalahan nga wala sang balatyagon para sa mga ARBs kag plantador ang rehimen ni Marcos Jr ilabi na ang DA paagi sa sekretaryo sini nga si Francisco Tiu-Laurel nga nagakumpas sang importasyon tungod kasahi niya bilang dako nga burgesya komprador ang mga traders. Iya dal-on kag pangapinan ang ila interes para sa superganansya. Indi sila apektado, wala ginagutom kag wala naka-eksperyensya sa pagpatay-patay nga trabaho sa duta.

Nagapanawagan ang Pambansang Katipunan ng Magbubukid (PKM)-Negros sa tanan nga mga ARBs, small planters, mga mamumugon sa kampo kag sentrales kag mga mangunguma nga maghiliusa, bugkuson ang kusog, abuton ang iban pa nga sektor para pamatukan ang makahalalit kag mapangwasak sa palangabuhi-an nga polisiya sang neoliberalismo sang reaksyonaryong estado.

Ang pagsulong lamang sang pangmalawigon nga inaway banwa amo ang magasalbar sang ila palangabuhian, magahaw-as sa ila sa kapigaduhon kag magapaseguro sang bugana nga buasdamlag.

The post Sugar Order No. 2, pagpadayon sang wala untat nga importasyon appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.