Bisan pa sa tion sang Paskwa, padayon nga ginapasingki sang pasistang 62nd IB ang pagpang-atake sa mga sibilyan kag komunidad sang mga mangunguma sa mga syudad sang Guihulngan kag Canlaon sa Negros Oriental kag mga banwa sang Moises Padilla kag Binalbagan sa Negros Occidental.

Disyembre 13 sang gab-i, ginlusob kag ginpahug sang desperadong tropa sang 62nd IB ang panimalay sa pamilyang Turno sa Sityo Laos, Barangay Binubuhan, Guihulngan City. Kaupod sa pasistang tropa ang mga traidor sa rebolusyon kag surrenderees nga ginapamunuan ni Renante Mission (@Karding/Tibor/Eman). Pilit sila nga ginapaako nga suporter sang NPA. Ang pamilya Turno ang masami na nga ginapahug sang militar sa lugar.

Disyembre 15 sang hapon, hungod nga gintiro kag ginpaarakan sang pasista apang nerbyuso nga katapo sang 62nd IBPA ang karabaw sang pamilya Blasco sa Sityo Tibobong, Barangay Quintin Remo, Moises Padilla. Patay ang nasambit nga karabaw nga ginkasubo sang pamilya bangud amo lamang ini ang katimbang nila sa pagpangabuhi kag produksyon.

Disyembre 20 sang gab-i, lima ka tropa sang pasistang 62nd IB upod gihapon ang traidor sa rebolusyon nga si Renante Mission (@Karding/Tibor/Eman), ginlusob man sini ang mga panimalay sa Sityo Tiyos, Barangay Quintin Remo, Moises Padilla ilabe na ang pamilya Quiñanola. Pilit nga ginapaako sila nga mga suporter sang NPA. Mabaskog nga ginareklamo nila ang pagpamahug kag pagtiner sang militar sa ila lugar.

Samtang sang Disyembre 22, may mga kolum sang militar nga makit-an sa Sityo Manlibod, Barangay Trinidad, Guihulngan City.

May 50 ka tropa sang 62nd IB nga naga-operasyon sa Sityo Palaming sang Barangay Binalbagan, mga sityo sang Nabuluan kag Batang-batangan sang Barangay Bucalan tanan sang Canalon City.

May mga kolum man sang militar sa mga sityo nga sakop sang Barangay Amuntay, Binalbagan, Negros Occidental.

The post Desperadong 62nd IB, padayon nga nagapang-atake sa mga komunidad sang mangunguma appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.