Pula nga pagsaludar ngan hitaas ng pagkilala para kan Mormor “Ka Turing” Martines Arnesto, usa ha mga napatay ha desperado aerial strike han pasista nga JTF-Storm ngan 78th IB bukid nga lupgop han Nipa, Palapag, Northern Samar hini nga naglabay nga Nobyembre 29, alas dos han kaagahon. Kaupod ha namartir, ni Ka Turing an iya asawa nga hi Presilda “Ka Hilda” Gerbon. Nakikiduyog ha kasubo kami ha mga nailo nga mga kabataan, pamilya, kapareho naninindugan nga parag-uma ngan mga nagin kaupod ha yunit han Bagong Hukbong Bayan (BHB).

Maitatanding an panalagsahon ngan nalalain nga kakayanan ni Ka Turing ha karakter nga hi Dersu Urzula nga pelikula nga himo ni Akira Kurusawa. Hi Ka Turing, giuupayi ha tereyn ngan parubambaboy. An kabaltok ng aini ginpauswag ngan ginpanday han pira kadekada nga paghangkop ha iya klase komo parag-uma ngan komo rebolusyonaryo.

Igin-anak hi Ka Turing ngan dinako ha bukid nga aada ha ligid han Mount Bubuyaon nga nalupgop ha bungto han Palapag, Mapanas ngan Catubig. Nagserbe ini nga bag-o nga puruy-anan han mga nagresetol nga parag-uma tikang ha Canonghan, Palapag hadton 1979 tungod han pasista nga pangatake kaupod an pagpatay han hadto anay kapitan han barangay nga hi Domie Capangpangan ngan pagsunog ha kabablayan han mga parag-uma han 60 PC Batallion.

Ha resetol ngan bubkid, diri la napanday hi Ka Turing han kolektibo nga paggios para ha pagpapauswag han produksyon ngan pa nga mga buruhaton, napanday liwat an iya kahibaruan nga pagkabisa ngan pagbasa han tereyn tubtub ha kasusudkan. Listo liwat nga parupambaboy hi Ka Turing. Lain ha Mount Bubuyaon, kabisado liwat niya an tereyn han Mount Pamakyasa, an bukid nga nalupgop ha mga barangay han Sangay, Capacujan, Nipa ngan Maragano han Palapag diin nagtikang an pamilya han iya iroy.

Kahuman mapatalsik an hadto anay diktadura nga Marcos Sr, igin-abre an pagpapabalik han mga nagresetol ha ira baryo. Kundi, nagpabilin an pamilya ni Ka Turing ha bukid tungod ha ira pakabuhian ngan an diri hul-os nga pagtapod ha saad han reaksyunaryo nga estado nga pagrespeto ha tawhanon nga katungod.

Utro nga nahiagum an mga parag-uma kaupod an pamilya ni Ka Turing han pasista nga pangatake hadton 1993-1994, panahon han pasista nga Captain Bilion. Ginransak, gin-aliskay an ira balay ha bukid, ginkawat an ira mga inataman nga hayop ngan higamit. Gindakop liwat an iya iroy han mga pasista nga tropa.

Nagin kaapi hi Ka Turing han Yunit Milisya (YM) ngan ha dayuday han Partido. Komo kaapi han Partido, nagin aktibo nga kaapi hiya han YM ngan mas ginpakita an kabaltok ngan kahibaruan ha tereyn, sugadman an kabaltok ha pagbasa han gios han kaaway ha panahon han mga pankombat ng operasyon. Dako an nagin papel niya ha paghahatag kahibaruan ha mga kaapi ngan kumand han BHB ha mga bag-o nga ruta ngan popoyde nga base. Diri matutupungan an pira kabeses hini nga pagbulig agud imaniobra ang BHB ha larang nga pag-ensirkulo ngan pag-atake han kaaway. Ha baryo, kaupod hi Ka Turing ha aktibo nga napartisipar ha mga buruhaton han pagrekon ngan pag-aram ha palibot para ha seguridad.

Komo tawo ngan rebolusyunaryo mayda liwat mga kaluyahan hi Ka Turing. Nagresulta ini ha usa nga pagsasayop ha igkasi niya parag-uma, nga hul-os man niya nga ginkikilala. Luyo han pagmenos ha iya, igin-abre niya an iya kalugaringon ha imbestigasyon ngan kasunod nga desisyon komo pitad ha iya baratunon, nga gintalinguha man niya nga ginpatuman.

Ha pagsurender han traydor ngan nakumbert han kaaway nga hi Rimando “Dudong” Baluya hadton 2020 ngan an kasunod nga pasista nga pangatake han 20[th] IB ha mga parag-uma ha ira baryo, kaupod hi Ka Turing ha mga waray magpauwat. Nagpabilin hiya nga madig-on, nagpadayon ha buruhaton ha uma ngan mga rebolusyunaryo nga buruhaton.

Tungod ha angkon nga kakayanan ngan kahibaruan ha tereyn ni Ka Turing, sugad na la an desperado nga panalinguha han pasista ng militar agud pasurenderon hiya ngan gamiton kontra ha kagiusan. Hadton 2023, gin-atake han armado nga pwersa han 74th IB an ira balay ha ira produksyon ha “447” nga dapit. Iligal nga gin-aresto, ginhadlok ngan iginpriso ha kampo an iya asawa nga hi Ka Hilda ngan upat nga anak kaupod an tulo nga menor de edad. Ginhimo nga hostage ngan paon han 74th IB ngan MTF-Elcac an iya pamilya agud piriton nga sumurender hi Ka Turing. Gin-atentar pa nga igkumbert komo asset han militar an iya asawa nga hi Ka Hilda.

Waray magpabantad ngan sumurender hi Ka Turing. Labot ha pirme hiya natapod ha sagdon han iya igkasi naninindugan ngan kolektibo nga parag-uma, ginpadig-on liwat hi Ka Turing han paghigugma ha iya klase ngan an pagtuod ha katukmaan han pagrerebolusyon. Gin-giyahan niya hi Ka Hilda nga makagawas tikang ha panhohostage han kaaway, sugad liwat an iya mga anak. Kahuman hini, nagdesisyon hira nga hul-os nga panahon nga gumios ha BHB. Pormal hira nga igindeklara nga membro han BHB hadton Marso 2024.

Ginpamatud-an han kasaysayan han kinabuhi ni Ka Turing, anuman an iya mga pagkukulang, labaw nga landaw an igin-gahin niya nga panahon ngan paggamit han iya kapanalagsahon ngan ispesyal nga kahibaruan para sa rebolusyon. Iginpakita niya an determinasyon, kaisog ngan pagigin tangkod ha masa nga parag-uma ngan ha rebolusyunaryo nga kawsa. Diri sugad han iba nga nagmemenos ha iya, waray pagtalikod ngan pagtraydor hi Ka Turing bisan anupaman kakuri an mga sakripisyo. Tubtub ha iya urhi nga gininhawa, ginpakyas niya an kaaway nga gamiton an iya kahibaruan kontra ha masa nga parag-uma ngan ha rebolusyon.

The post Hitaas nga pagsaludar kan Mormor Arnesto, an “Dersu Urzula” han Bagong Hukbong Bayan appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.